აღწერა
ჯემალ ლოლუას 1991 წლის ილუსტრაცია „საქართველოს რუკა” ასახავს რუკის კონტურებში მოქცეულ აგრესიულ, დაპირისპირებულ ადამიანთა ერთობლიობას. შეიარაღებული პირები, მომართული თოფები, ტყვიამფრქვევები და ცენტრიდან გამოშვერილი ქვემეხის ლულა პირდაპირ გადმოსცემს სამოქალაქო ომისა და საყოველთაო მილიტარიზაციის უმძიმეს რეალობას. მასაში ერთდროულად ჩანან მომიტინგეები მუშტებითა და მიკროფონებით, რაც პოლიტიკურ პოლარიზაციასა და ქაოსზე მიუთითებს. ნამუშევრის სათქმელს აძლიერებს მასზე დატანილი ზაურ ბოლქვაძის ორსტრიქონედი: „ჩვენში როცა ძაღლი იცნობს პატრონს, ჩვენ მსოფლიო მაშინ გვიცნობს მარტო”, რომელიც სარკასტულად მიანიშნებს ქვეყანაში ლეგიტიმური ლიდერის არარსებობაზე. ნახატი აშიშვლებს „ძმათა მკვლელობასა” და სახელმწიფოებრივი ერთიანობის რღვევას, სადაც შიგნიდან მოწყვლადი ერი მსოფლიოსთვის მხოლოდ ამ შინააშლილობით ხდება ცნობილი.
